Umali Kayo Sa Baguio

Sulat-panaw ni Tomas Sumakwel

ALAS tres sa hapon ang sabot nga magbagat sulod sa buhatan sa kalihokang pangpubliko sa mahabog nga bilding sa Nasodnong Komisyon Alang sa mga Kultura ug Arte (NCCA) nga maabot rag lud-an gikan sa opisinas Bisaya Magazine nga akong gialagaran. Kami si Johnny Baby ang unang nangabot. Kami ang kinalay-ag payag sa tanang buot mokuyog kay sa Bulacan pa man mi, silingan ra. Ayay, mao ra ba gyod niy pabilo sa akong sapot ang paghulat sa gikasabot nga wa pay segurong moabot. Apan ginindotan hinuon kong naghunahuna nga dugay pa sila. Ang dis-og sa mga gutlo, mao hinuoy nakapaespeso sa gumaguma nga nagsugod nag tubo sa akong kaugalingon. Tiaw mo, makaadto na kog Baguio? Payter man kuno kaaynang Baguio, ingon sa mga nakaadto.

Mapamatud-an ko na gyod unsa katinuod ang gipanghambog nilang katugnaw. Ah, tugnaw god. Mayg di ta anad og bukid nga taga bukid god ta. Pero dinhay miingon nga pagdala na lang gyog segurog dyaket kay kon magkinaunsa dili ka maparehas sa tigsong gikudman.

Pagsaylo sa alas kuwatro, kompleto na ang grupo. Andam na kaayos Sherma. Dinha na silas Jhell ug Lino nga managsamang crew sa uska estasyon sa TV, ambot unsiyalan tong tebiha, UNTV man tingali to, sigeng kulkog sa unsa pod toy mikagar sa ilang kamera. Andam na pod si Ma’m Sol ug ang iyang tsikiting (kinsa hamis kaayog aping kay wa gyod kuno katilawg sabon ang nawong, matod sa iyang Mamita Sol). Apil sa drayber nga si Julius, walo ming tanan— walo sa panawng puno sa kulbahinam. Si Johnny diay, otro sang bigsa pa kaayog Baguio kay, bisan tuod taga Norte sad ni siya, Sarrat, Ilocos Norte, para klaro gyod, wa pa sad kaadto. Sus, kadakong Ilokano! Nya ang Baguio apil man sa giingong “kailukanohan”. Pero layo man sad diay kuno kaayo ang Baguio sa ilaha, tuyoon man.

Diin na ta ato?


[Padayon og basa dire]